یہ میری آخری کال ہے، آپ لوگ رونا مت…
دبئی کی جیل میں قید باندہ کی شہزادی: 24 گھنٹوں میں ہوسکتی ہے پھانسی
باندہ: اتر پردیش کے باندہ کی رہنے والی شہزادی، جو ابوظہبی کی البداوا جیل میں قید ہے، کو اگلے 24 گھنٹوں میں کسی بھی وقت پھانسی دی جاسکتی ہے۔ ابوظہبی کی عدالت نے اسے سزائے موت سنائی تھی، اور جیل انتظامیہ نے اس کی آخری خواہش پوری کرتے ہوئے اہل خانہ سے فون پر بات کروائی۔ باندہ کی شہزادی کہی جانے والی خاتون نے اپنے مخالفین کے خلاف باندہ میں درج مقدمہ واپس لینے کی اپیل بھی کی۔
کیا تھا معاملہ؟
2021 میں باندہ کے گاؤں گویرا مغلی کی رہنے والی شہزادی کو آگرہ کے عزیر نامی شخص نے پرتعیش زندگی کا لالچ دے کر ابوظہبی بھیج دیا، جہاں اسے ایک جوڑے کے حوالے کیا گیا۔ شہزادی اس جوڑے کے بچے کی دیکھ بھال کرتی تھی، لیکن اچانک بچے کی موت ہو گئی۔ جوڑے نے بچے کی موت کا الزام شہزادی پر عائد کیا، جس کے بعد عدالت نے اسے سزائے موت سنا دی۔
والدین کی فریاد
شہزادی کے والد، شبیر خان، نے حکومت سے اپنی بیٹی کو بچانے کی اپیل کی تھی۔ ان کا کہنا ہے کہ ان کی بیٹی بے قصور ہے، اور بچے کی موت غلط علاج کے باعث ہوئی تھی۔ تاہم، تمام کوششوں کے باوجود کوئی مدد نہ مل سکی۔
آخری کال کے بعد کہرام
جیسا کہ آپ وڈیو میں دیکھ سکتے ہیں کہ اتوار کی رات باندہ کی شہزادی سے موسوم بیٹی نے اہل خانہ کو فون کیا اور بتایا کہ اسے اگلے 24 گھنٹوں میں پھانسی دی جائے گی۔ اس خبر کے بعد شہزادی کے گھر اور گاؤں میں کہرام مچ گیا، اور والدین کی فریادیں بے اثر نظر آرہی ہیں۔
اس خبر کے متعلق اپنی رائے کا اظہار کمینٹ میں ضرور کریں
